Bap - Zofall Un E Janz Klei Bessje Glock Lyrics

Ne Zofall bloß, dat et jraad he die Stadt wohr,
jraad he dä Park, dä noh Holunder roch,
met welke Ruhse, nur noch Jestrüpp met Dohne
un doch vertraut, neu wohr hück bloß ihr „Doch“.
Suvill wie Basta, hä kennt dä Punkt, wo Schluß ess,
definitiv: jespreng wohr jede Bröck.
Hä ring noh Luff, „wievill noch vun dä Tiefschlääch?“
Un wirf et Handdoch –„wohr wohl nix met Glöck!“

Dann ahm Kanal entlang un keiner säht jet,
total verwirrt, en Leuchtschriff „Zimmer frei“
’t wohr ihr Hotel, su’n Bruchbuud wie sick Johre,
dann noch en Naach, die wie ne stumme Schrei.
E Saxophon, fröhmorjens vun jottweißwo,
hä fing dä Breef... „hann’t immerhin versöök“.
En dämm Moment jeht sie durch die Arkade,
Postskriptum steht do noch: „Ich wünsch dir trotzdem Glöck“.

„Drieh bloß nit durch“, befiehlt’e sich, „op keine Fall,
Mann“
hä kennt dä Trick, dä en der Regel funktioniert:
“Einfach su dunn, als wöhr dir alles drissejal, Mann,
als wöhr sie’t letzte, wat dich jemohls interessiert“.
Ne blinde Bettler op nem Schachbrett hällt der Hoot hin,
en Handvoll Kleinjeld hätt se övvrich, wirf et rinn.
Dä Ahl nick dankend un zällt noh, ob et jenuch ess,
„Wohl nur ne Zofall“, sähte, luhrt ihr noh un grins.

Bei ihm em Zemmer em Hotel, do tick en Uhr bloß.
He musse russ – verflucht nochmohl – doch wohin nur?
Hä ihrt nohm Hafen raff, he wohr die Auswahl nie jroß,
och wenn et heiß, dat he Matrose Schangse hann.
Ihm ess ejal, aff wo en Sehnsucht zu’ner Sünd weed,
„Die krieg ich widder“, schwörte sich, „die krie’sch
zeröck,
weil mir sinn Zwilling, mir zwei, wat nie vorbeijeht,
’sch bruch nur’ne Zofall un e janz klei’ bessje Glöck,
Mann...“